إبتسامتهم

مرحبا

كالعادة وبكل سفرة خارج منطقة الشرق الاوسط أرى الابتسامة

الكاشير يبتسم
اللي تحط الاغراض بالسوبر ماركت تبتسم
سائق التاكسي
حتى الفقير المشرَّد اللي مقطوعة يده اليمين وعلى كرسيّه المتحرك عند محل تارقت يبتسم
رغم قساوة الحياة

البلد معروف عنها ببلد الحرية
قاعد أتنفس الحرية بأرضه وجمهوره
وقاعد آكل برغر بين أرضه وجمهوره
لكن بنفس الوقت البلد ما ترحم
اللي ما يشتغل راح ينتهي هوملِس

على كلام روبِرتو المكسيكي
اذا تبي تشتغل راح تلقى الشغل
واذا ما تبي تشتغل راح تقعد هوملِس ورافع كرتون كاتب فيه قصة حياته
وتدور على حشيش وويسكي

احد الممرضات تقول ان اهلها بولاية ويسكانسن
وتشتغل هني بولاية مينيسوتا
وتسكن بشقة مشتركة مع بنتين
وشغالة بكل اجتهاد
وابتسامة

روبِرتو طلع من المكسيك وتوظف بالولاية
وتم علاجه من مرض القلب بتكلفة امية وعشرين الف دولار
تكلفة لا يستطيع دفعها
تزوج
وتطلق
وعنده عيال ما شافهم من فترة بسبب الطلاق
وهو يعمل سائق بكل اجتهاد
وابتسامة

عبدالرحمن... اعتقد اسمه عبدالرحمن
صومالي ويشتغل سائق الصبح وحارس مواقف سيارات بالليل
يقول انا ما احب اتكلم عن السياسة
ولو ابي اكون سياسي كان درست علوم سياسية
عبدالرحمن يبي يجمع فلوس عشان يدرس تمريض واسعاف
وايضا ماليا يساعد اهله
وابتسامة

الغريب اللي بالشارع
لا يعرفني ولا اعرفه
ابتسامة

شنو سر ابتسامتهم؟
ما أحب افكر وايد وأفكر وأحلل سر ابتسامتهم
لأنهم كفار طبعا
لا أتغشمر

الابتسامة اهي ابتسامة
ودام الشعب مبتسم انا ايضا مبتسم واعيش لحظة الابتسامة
رغم ان اخوي مريض وقاعد يتعالج

بس أعتقد... أعتقد
ابتسامتهم هي خليط من الحرية
والاستقلالية
كل واحد يسعى لتكوين نفسه ويعيش حياته بنفسه
دون قيود الاهل والمجتمع

بالاضافة الى ذلك... الفرد يعيش يعيش كإنسان
واذا أخطأ... المجتمع ما يعتبره منبوذ
بالنهاية هو انسان
يصيب ويخطي
مش ملاك

على طاري الملاك
انشالله راجع لبلد الملائكة اللي لا يخطئون... الكويت
على الاسبوع الجاي
وأترك اخوي مع الوالدة بعد ما تعدى المرحلة الحرجة من العلاج
لأني تعبت
وعندي شغل بالديرة

بنفس الوقت أفكر تكون لي زيارة ثانية لأمريكا
بمناسبة غير مرافق مريض
سياحة مثلا
دراسة مثلا
كاليفورنيا وفيغاس ومسخرة وعمات عين مثلا

Enjoy life