مقابلة احد البنوك الاسلامية لاخوي

رجع اخوي ممتعظ محتقن بعد المقابلة الوظيفية له في احدى البنوك الاسلامية. جلس على القنفة بالصالة يحكي قصته مع اللذين قابلوه وكله شد وعصبية. وساذكر لكم جزء من حزمة الاسئلة اللي مالها داعي والحوار اللي دار بينه وبينهم

الاشخاص اللي بالمقابلة ثلاث. اخوي والمقابل واللي جنبه

اولا ابتدوا بانه كيف انت من عائلة الفلان وهل انت تعرفهم اسئلة من هذا القبيل ثم دخلوا بالعميق

المقابل: هل انت تصلي؟

اخوي باستغراب: نعم اصلي

المقابل: متى اخر مرة صليت؟

اخوي انصدم الا خمس دقائق: بعد متى اخر مرة صليت. الصبح

المقابل اللي جنبه قائلا للمقابل: بس بس... الحين اصيده لك

واخذ يطرح السؤال: وين تصلي الجمعة؟

اخوي انصدم من كلمة الحين اصيده لك!! ورد: اصلي بمسجدنا بقطعة خمسة

المقابل اللي جنبه: اي شاسمه المسجد؟

اخوي: مادري شسمه بس هو مسجد ابيض من اكبر مساجد الكويت

المقابل اللي جنبه باستهزاء: هذ المسجد اسمه مسجد عبدالعزيز الزبن

اخوي: اشدراني. انا اروح اصلي فيه

المقابل: سمع لنا سورة الاخلاص

اخوي وقد غلب عليه التوتر: الصراحة ما اعرفها

المقابل: اشلون ما تعرفها

اخوي: لو تقولي بشنو تبدا ممكن اكمل لك اياها

المقابل باستهزاء: سورة الاخلاص تبدا ب قل هو الله احد... سمعها لنا

اخوي اللحظة هذي خلاص

ارتفع مستوى الادرينالين في دمه

انخفض مستوى الاكسجين في مخه

انطبخ مخه كما تطبخ الباجة كراعين

فقد اعصابه

فقد انسانيته

باختصار اخوي فصل

وجاء الرد العنيف من اخوي: قل هو الله احد ما اعرفها ومو حافظها

فاخذ المقابل واللي جنبه ينظرون الى بعضهم ويكملون باقي اسئلتهم اللي مالها داعي واتفقوا على ان رد اخوي رد غريب في حين لم يتفقوا على ان اسئلتهم غريبة

انا اللي اعرفه واللي متعارف عليه انه المقابلة ما هي الا وسيلة للتعرف على مؤهلك الدراسي ومدى استحقاقك له. والتعرف ايضا على خبرتك المهنية وجوانب من حياتك المهنية وشوي من الشخصية. بس مقابلة مثل هالمقابلة ما واجهت الصراحة

بالنسبة لي اذا كنت في مقابلة وحسيت ان اللي يقابلني مو محترمني ويبي يقزرها اقلب المقابلة عليه. وعلى قولة المثل هي خاربة خاربة خلينا نعميها

اجازة نهاية اسبوع سعيدة للجميع

References:

http://www.suggestsoft.com/images/gamefabrique/aladdin.gif
http://i164.photobucket.com/albums/u23/ukebec/aladdin_genie.jpg