دائما لما الواحد يقعد مع نفسه ويحط ايده على خده ويحاسب روحه بروحه(اشدعوة) يسترجع ذكريات جميلة كانت وقد كانت. واذا بي تذكرت يوم اللي طلع فيه خبر المكرمة الاميرية بالامس القريب. وياهي من مكرمة وياهو من يوم وهوتميل مسنجر
كعادتي الصبح صحيت من نومي, رتبت فراشي ولبست هدومي. وغسلت ويهي بالصابون مع اسناني بالمعجون. واخيرا بشتي تحت ابطي راكب سيارتي رايح دوامي. يعني يوم عادي نفس اليوم اللي امس ونفس باجر وعقبه
دخلت الوزارة
كل شي طبيعي
دقيت الكرت
كل شي طبيعي
بصمت
كل شي طبيعي
واذا بيفتشوني قبل لا ادخل الوزارة عادي عندي طبيعي
صعدت الاصنصور وسبحان الله الاصنصور يصعد
هم طبيعي
دخلت تكرمون الحمام عشان اعدل النسفة..... شكلي نفس امس ما تغير
مرة طبيعي
وجان اقابل زميلي وصديقي المهندس... وهات اللي مو طبيعي
صديقي ابتسم بويهي الصبح
مو طبيعي
مو طبيعي
وانا عند باب المكتب قريت خبر المنحة والجريدة كانت على طاولته
نظري صار سته على سته يا جماعة
مو طبيعي
مديري حده مستانس وما طلب مني اسوي اي شي بهاليوم
مو طبيعي
خلص الدوام بدون اي تحلطم مني
مو طبيعي
بالشارع, لفيت على واحد بالغلط, ما صارخ ولا سب ولا حتى دق هرن
مو طبيعي
واحد لف عليي وانا ما سويتله شي
مو طبيعي
زحمة بس محد مكشر ومحد متضايق ومحد ماد بوزه
مو طبيعي
الوالد ما طلع من غرفته
مو طبيعي
الوالدة تسال عن الوالد
مو طبيعي
وجان اليوم كله يصير مو طبيعي. وناسة وسوالف مع الاهل عن مشاريع الالف. خمسين بالامية بيسافر وتسعة واربعين بالامية بيشترون ايفون وواحد بالامية مثلي بيشتري تلفزيون ال اي دي
يعطيه العافية سمو الامير على المكرمة والله يحفظ ديرتنا ويخلي شعبها
References:
2 comments:
الله يتمم! ;P
علينا وعليج بالخير والصحة والعافية
Post a Comment