Friday, July 8, 2011

ديوانية, اهل وذكريات

دائما ما نتجمع بالديوانية مع اهلنا الكبار نسولف باللي لنا دخل فيه واللي مالنا دخل فيه. شوية جد وشوية ضحك وشوية طرب ودندنة وشوية صواريخ من اهلنا المتقاعدين. الذكي والفاهم يصيدهم واللي على نياته يصدق

الاسبوع اللي طاف من الاسابيع كان الاهل بالديوانية يسولفون عن حياتهم قبل وكلي اندماج في سماع سوالفهم... وخذ من الضحك والفضايح في زمنهم الجميل... واليكم بعض المقتطفات من احاديثهم... يعني ما ساكتبه لاحقا على ذمة الراوي... انا مالي شغل... وفي رواية اخرى انا مالي شقل
:D

الحر
يقولون ان قبل كان في حر بس مو بقوة الحر اللي عندنا. الوالد من شرق كانت بيوتهم من طين وهذا اللي كان يخلّي البيت فيه نوع من البرودة من تدخله. اما زوج عمتي فكان ساكن بالمرقاب ويقول كان بيتهم من الجبس وهم بعد كان يبرد عليهم 
ويقول الوالد انه حتى وهو في الصباحية كانوا يقعدون برّة البيت هو والربع بالصيف والهوا بارد نسناس (نسيم البحر) اما الحين تطلع بالليل الهوا لاهوب

بيت الحكومة
كان تصميم الحكومة للبيوت دور واحد وهو الدور الارضي عبارة عن حوش عربي وحوالينه الغرف. يعني ما يحتاج تطلع من الغرفة تنزل درج وتمشي ممر وتطلع صالة عشان توصل الحوش. بس بطّل باب غرفتك تشوف المحيط الخارجي 

الالعاب والهوايات
ماكو بلايستيشن... معظم العابهم يكون فيها خش او ركض او الاثنين معا... اشفيني المحلّل
اللعبة اللي شدتني وهم يسولفون هي لعبة فكرتها ان واحد ينخش بعباية امه ويمشي بالفريج واذا مسك الباب او الشبّة اللي متفقين عليها دون ان يصيده احد الشباب يفوز... وتعالوا يالربع شلون نصيد صاحبنا من بين حريم الفريج
اما هواياتهم فكانت متركزة على صيد الطيور والعصافير... وكانت اول خطوة هي ان يرفع الوالد غطاء بالوعة البيت وينزل في حفرتها... ويصطاد ما لذّ وطاب من الزهيوي والقبّي, وهو مستانس, لصيد هذه الطيور 
ويا ويلها البالوعة اذا ما فيها زهيوي او قبّي


هذا والوالد يقول ان قبل الزهيوي هو اللي كان يخاف منك مو الجيل هذا اللي صار للزهيوي شخصية 
ومن هنا كل واحد ياخذ الفخ ماله ويطلع المنقف ويصيد بهالطيور والعصافير. بعدها بنتّف ريشهم ويشويهم. وكأنّ مافي دجاج مثلّج بالبيت

صيد الحيايا
كانوا يطلعون المناطق البرية يصيدون بهالحيايا. يقول عمي كنا نعرف المكان اللي فيه الحية ام جرس وكنا نصيدها ونعطيها لمدرّس العلوم وكان المدرس يستانس ويعطي درجات عليها 
ويقول كان في نوع من الحيايا اللي كان سريع ويقفز مع طيران بالهوا. كانوا يلعبون معاها كر وفر 
كانوا يروحون لها فتنقز عليهم وينحاشون ويعيدون الكرّة لييين يصيدونها... ليش مادري

 كل شي ببلاش
 كانوا يطلعون السينما بمئة فلس فقط لاغير. المئة فلس هذي كانت تغطي تكلفة التوصيلة ودخلت السينما وشغل البقالة... لا ويبقى منها كم فلس بعد
خلونا من هذا... هم بعض الاحيان ما يدفعون فلوس ابد... كانوا لما الوانيت يوصّلهم يخلّون اسرع اثنين يقعدون مع السايق والباقي ورا الوانيت. ولما يجي وقت الدفع يروحون اللي ورا والوضع طبيعي. والاثنين يقولون كم حسابك. ما يمديه السايق يحسب الاّ والشباب رافعين دشادشهم وانحش يا ولد 
نفس الحالة مع الحلاّق... المسكين يحلق الشباب وعددهم قريب العشر رؤوس. واخرتها انحش يا ولد
ونفس الحالة ايضا براعي البقالة
بس مو كل مرّة تسلم الجرّة


الدراسة
يقولون الاهل انهم ما كانوا يدرسون الا وقت الامتحانات
وانهم ما كانوا يدرسون داخل البيت
هل كانوا يدرسون بالمكتبة ... نو
هل في كوفي بيين ولا ستاربكس... نو
اجل وين
طال عمركم كانوا يدرسون تحت الشبّة باللّيل... بالفصيح تحت عمود الانارة
كان ثلث الوقت دراسة وثلثه الاخر براشيم وثلثه الاخير طرب وسلطنة ودندنه

الشيخ جابر والشيخ سعد الله يرحمهم
يذكر الوالد ان الشيخ جابر رحمة الله عليه انه كان يواظب على مشاهدة افلام السينما في سينما السبارات لما كان محافظا للأحمدي
وفي محادثة اخرى يذكر الاهل انا الشيخ سعد رحمة الله عليه كا يطلع من قصره ويروح للبحر يسبح. يشوفونه الناس وينادون بعض: تعالوا شوفوا الشيخ سعد يسبح

ملاحظة: التدوينة هذي كتبتها قبل اسبوع من النشر... مؤخرا فيني زحمة حياة
Take care all :)

References:

6 comments:

Seema* said...

Good times! :")

ستة وسبعين said...

الله أحب الذكريات

أحلى شي فقرة الدراسة
أحنا نكرف الحين وأهلنا يبون منا أكثر
و أهما كانوا ما يدرسون

;p

Addictioneer said...

@Seema*
Yeah. Good old times
Life was simple. Not a productive environment for geeks though
:)

@ستة وسبعين
عدل كلامك
الدراسة ولا على بالهم ذاك الوقت
اطالب الوالد بتعويض عن كل طراق وكل تكفيخة وكل لسبة خيزرانة سببها كان دراسي
:p
اتغشمر
الواحد يحمد ربه ان اهله كانوا يشدون عليه دراسيا ولا كان ما وصل هالمواصيل
بس عاد لا يقوللي كمّل ماجستير ودكتوراه
بس خلاص تعبت
:)

Slashy said...

انا اوافقك بسالفة الدراسه اكثر شي

واللعب لووووووول لا تذكرني بسواد الويه احنا مع الزومبي ميشين

Butterfly Chick said...

الحر
Yeah i heard this a lot.. wayed nas egoloon gabel makan 7ar nfs chethee 7ata law ne6la3 br3 mo chee! oo 7ta tara el bard egoloon gabel kan abrad :P

بيت الحكومة
bait yadeti allah yer7mha kan chee.. their old house ya3ni.. i remember el 7oosh kan fel ni9 oo 7awaleeneh kela e7jar.. it was nice though :)..

الالعاب والهوايات
loooool .. eww to the zheewi part! ana my mom used to tell me ena eyawdoon el jarad :P and yeah some of them used to catch el ezheewi YUCK :P
I dont wanna sound old, bas b3d 3la ayamna we used to play outside which used to be much fun than now.. mathker kent agool METMALELA! a7een el yahal kela metmaleleen o mayadroon sheswoon even when they have play station or watever

كل شي ببلاش
hehehehe.. agree on the cinema part :P mom used to tell me this too lol.. bs b3d el 100 fils kanat shay wayed 3ood lehum gabel :P..

الدراسة
lol darjathum matsharaf 3ad 9ara7a :P lol ana meskeena omi kanat etgool ena she used to help her mom on cleaning cookin and everythin around the house then she studies.. e7na wayed dalay3na hal ayam :P MAMA MAGDAR LAZM ADRES !! lol


enjoyed reading ur topic :)

Addictioneer said...

@slashy
لوووول
بعد اللعبة هذي خلاص اعلن رسميا اعتزالي العاب الشوتنغ

@Butterfly Chick
Me too, enjoyed reading your comment
:)

كفو الوالدة... تسوي شغل البيت وتدرس
الله يخليها لكم